ភ្នំពេញ៖ គិតត្រឹមរសៀលម៉ោង៤កន្លះថ្ងៃនេះ កីឡាករគុនខ្មែរចំនួន ២រូបទៀតគឺ ខាំ ខ្លានាង បានមេដាយមាសលើវិញ្ញាសាទម្ងន់ ៥១គីឡូក្រាម ក្រោយឈ្នះកីឡាករវៀតណាម និងកីឡាករគុនខ្មែរ ហ៊ីម គឹមរៀង បានឈ្នះលើវិញ្ញាសាទម្ងន់ ៥៤គីឡូក្រាម ក្រោយយកឈ្នះកីឡាករឡាវ SOUKA KEOTHATALATH នៃការប្រកួតកីឡាស៊ីហ្គេមលើកទី៣២ នៅពហុកីឡដ្ឋានជាតិមរតកតេជោនារសៀលថ្ងៃទី១០ ខែឧសភា ឆ្នាំ២០២៣។

នៅថ្ងៃប្រកួតវគ្គផ្តាច់ព្រ័ត្រថ្ងៃនេះ មានកីឡាករគុនខ្មែរចំនួន ៤នាក់ហើយដែលបានឈ្នះមេដាយមាសជូនកម្ពុជា។ ក្នុងនោះមានកីឡាករគុនខ្មែរ ហ៊ីម គឹមរៀង កីឡាករគុនខ្មែរ ខាំ ខ្លានាង កីឡាករគុនខ្មែរ ម៉ាប់ ធារ៉ា និងកីឡាករគុនខ្មែរ ភុន ពិសិដ្ឋ។ កីឡាករគុនខ្មែរទាំង៣រូប គឺ ខាំ ខ្លានាង ម៉ាប់ ធារ៉ា និងភុន ពិសិដ្ឋ សុទ្ធតែបានយកឈ្នះកីឡាករវៀតណាម ចំនួន ៣រូបដូចគ្នា។

នៅល្ងាចថ្ងៃនេះ មានការប្រកួតកីឡាគុនខ្មែរ ចំនួន ២គូរបន្ថែមទៀត គឺរវាងកីឡាការិនីកម្ពុជា សំ សំណាង ជាមួយនិងកីឡាការិនីវៀតណាម Bang Thi Mai ប្រកួតលើវិញ្ញាសាទម្ងន់ ៦០គីឡូក្រាម និងគូប្រកូតមួយគូទៀត រវាងកីឡាករកម្ពុជា ឡៅ ចិត្រា ជាមួយកីឡាករវៀតណាម Chau Dat Nguyen លើវិញ្ញាសារទម្ងន់ ៦៧គីឡូក្រាម។

កាលពីថ្ងៃទី៦ ខែឧសភា ឆ្នាំ២០២៣ មានកីឡាករគុនខ្មែរ ២រូបទៀតបានឈ្នះមេដាយមាស គឺកីឡាករ កាន់ ម៉េងហុង បានឈ្នះលើវិញ្ញាសារសម្ដែងគុនគ្រូ និងកីឡាការិនី មើយ ស៊ឹង ប្រកួតឈ្នះលើវិញ្ញាសាសម្ដែងគុនគ្រូ។

គិតត្រឹមរសៀលទី១០ ខែឧសភា កម្ពុជាមានកីឡាករគុនខ្មែរចំនួន ៦រូបហើយដែលទទួលបានមេដាយមាសក្នុងព្រឹតិ្តការណ៍ប្រកួតកីឡាស៊ីហ្គេមឆ្នាំ២០២៣៕